Skema e famshme e rimbursimit të fermerëve propaganduar disa herë nga Kryeministri Edi Rama rezulton të ketë qenë e dështuar. Autoriteti i Konkurrencës ka dalë me konkluzionin se fermerët nuk kanë përfituar asgjë nga skema e rimbursimit të TVSH-së. Në tregun e qumështit rimbursimi 20 për qind i Tatimit mbi Vlerën e Shtuar nuk përfitohet nga fermerët, por nga tregtarët apo përpunuesit.
Autoriteti doli me këtë konkluzion pas një hetimi disamujor që bëri të tregun ushqimor. Sipas të dhënave zyrtare për gjashtëmujorin e parë të vitit 2016, qeveria ka rimbursuar rreth 6 milionë USD për TVSH-në në sektorin e bujqësisë. Por, fermerët thonë se paratë nuk i përfitojnë ata, por mbahen nga tregtarët.
Qeveria e rriti masën e kompensimit të TVSH-së në bujqësi nga 6 për qind, në 20 për qind dy vite më parë për të ndihmuar femerët. Por, i gjithë mekanizmi funksionon përmes tregtarëve. Tatimet rimbursojnë grumbulluesin, i cili këtë rimbursim duhet t’ia kalojë fermerit, përmes çmimit më të lartë në blerje.
Që në fillim skema shfaqi probleme, pasi tregtarët nuk ia kalonin përfitimin fermerëve, por e mbanin për vete. Ministria e Financave propozoi një mekanizëm shtesë kontrolli, duke u kërkuar tregtarëve që t’i paguajnë fermerët përmes bankave. Por ky kusht është i vështirë për t’u plotësuar, veçanërisht për fermerët e vegjël, të cilët shesin sasira të vogla.
Skema e rimbursimit ishte një nga premtimet e PS në fushatën e zgjedhjeve të 2013-ës. Por, dy vite pas miratimit, kjo skemë mbetet ende problematike dhe paratë që qeveria rimburson nuk shkojnë tek femerët. Ky shqetësim është pranuar edhe nga Ministria e Bujqësisë (e drejtuar nga Edmond Panariti i LSI), e cila deklaron se ka propozuar heqjen e TVSH-së në bujqësi dhe subvencionin e drejtpërdrejtë për fermerët.
Në videon më poshtë dëgjoni deklaratën e Ramës më 4 Tetor 2016 me fermerët e Korçës
