Autoritetet spanjolle kanë shpëtuar më shumë se 1000 njerëz nga ujërat përreth Ishujve Kanarie këtë fundjavë, sipas të dhënave nga shërbimet lokale të urgjencës.
Sipas mediave të huaja mësohet se emigrantët kanë nisur udhëtimin e rrezikshëm nga brigjet e Afrikës së Veriut ku pjesë e tyre kanë qenë gra dhe fëmijë, të cilët duhej të shtroheshin menjëherë në spital.
Numri i madh i emigrantëve vazhdon ka qenë në rritje sidomos gjatë periuhës së verës. Në gusht, 2,931 emigrantë kanë mbërritur në këto brigje, gati tre herë më shumë në të njëjtin muaj të vitit të kaluar.
Mësohet se vetëm brenda ditës së hënë kanë mbërritur plot 630 persona.
Mediat e huaja shkruajnë se pesë varka me rreth 100 persona mbërritën në ishullin El Hierro këtë fundjavë, duke theksuar se është një numër “i paprecedentë” për ishullin me një popullsi prej pak më shumë se 11,000.
Këtë vit, gati 22,000 emigrantë kishin mbërritur në Spanjë në mënyrë të parregullt nga deti deri në fund të gushtit, më shumë se në të gjithë vitin 2022, sipas Ministrisë së Brendshme të Spanjës.
Komisioni Spanjoll për Refugjatët (CEAR) tha se 77 njerëz vdiqën duke u përpjekur të arrinin në Spanjë vetëm në gusht. CEAR kritikon mungesën e kanaleve ligjore për refugjatët që përpiqen të mbërrijnë në BE si shkak i “sasive të mëdha vuajtjesh dhe mijëra zhdukjeve”.
Sipas organizatës Walking Borders, rreth 778 njerëz vdiqën gjatë rrugës për në Ishujt Kanarie në gjysmën e parë të këtij viti./Opinion.al
