Një atentat mafiozë i mirëorganizuar tronditi ditën e sotme Durrësin. Objektivi i këtij atentati dyshohet se ishte prokurori Arjan Ndoj, i cili u qëllua me breshëri plumbash në vendin e quajtur “Mbikalimi i Shkozetit”.
Po ashtu së bashku me Ndojin janë plagosur dhe dy persona të tjetër të cilët udhëtonin në makinën e tij. Bëhet fjalë për Aleksandër Laho, i njohur ndryshe si Landi Muharremi, dhe shoferi i prokurorit, Andi Maloku.
Duke iu referuar mënyrës se si ndodhi atentati, dyshohet se autorët kanë pasur informacione të detajuara mbi lëvizjen e prokurorit, pasi kanë sulmuar pikërisht në një vend ku nuk ka pasur kamera sigurie.
Po ashtu bëhet me dije se ndaj makinës së prokurorit tip ‘Benz’ AA 333 ZD është qëlluar me breshëri automatiku model 56, nga një distancë rreth 30 metra.
Duke u nisur nga distanca jo shumë e afërt, duket se shoferi mund të ketë kuptuar se një mjet do t’i sulmonte pasi ka devijuar nga rruga.
Ndërkohë, bëhet me dijes e Ndoj dhe Aleksandër Laho (Landi Muharremi) janë jashtë rrezikut për jetën, ndërsa në gjendje të rëndë është Andi Maloku, i cili ndodhet në spitalin e Traumës në Tiranë për mjekim më të specializuar.
Lidhur me ngjarjen janë shoqëruar disa persona, por deri më tani ende nuk ka informacione zyrtare nëse policia ka identifikuar autorët./ Opinion.al
