Policia e Durrësit ka arrestuar një 32-vjeçar, pasi dyshohet se është autor për 8 vjedhje dhe për 6 tentativa për vjedhje, në banesa të ndryshme të qytetit.
Sipas uniformave blu bëhet me dije se kanë vënë në pranga shtetasin Oliv Tusha, 32 vjeç, pasi gjatë periudhës së verës ka vjedhur shtëpi të ndryshme në qytetin bregdetar.
Mësohet se arrestimi i tij u krye falë operacionit policor të koduar “Çelësi”, pas disa denoncimeve të marra nga qytetarët për vjedhje në disa banesa.
“Si rezultat i hetimeve të kryera nga specialistët për Hetimin e Krimeve të Komisariatit të Policisë Durrës, mbi denoncimet e marra tre muajt e fundit, për vjedhje dhe tentativa për vjedhje, në banesa në lagje të ndryshme të qytetit, është finalizuar operacioni policor i koduar “Çelësi”, në kuadër të të cilit është identifikuar, kapur dhe vënë në pranga shtetasi Oliv Tusha, 32 vjeç, banues në Durrës.
Nga hetimet e kryera rezultoi se 32-vjeçari, gjatë periudhës qershor-gusht 2023, ka vjedhur në 8 banesa dhe ka tentuar të vjedhë në 6 banesa të tjera, sende personale, sende me vlerë dhe pajisje të ndryshme.
Në cilësinë e provës materiale u sekuestruan 25 ora, 5 celularë dhe bizhuteri të dyshuara të vjedhura, si dhe çelësa dhe mjete që dyshohet se i kishin shërbyer shtetasit Oliv Tusha, për të kryer vjedhjet.
Vijojnë hetimet për të zbardhur vjedhje të tjera që mund të ketë kryer ky shtetas”, tha policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme./Opinion.al
