Kryeministri Rama ishte sot i pranishëm sëbashku me ministrin e Brendshëm Sandër Lleshaj dhe ambasadorin e BE Luigi Soreca në përurimin e automjeteve të reja që janë vendosur në dispozicion të policisë së shtetit.
Ky është një investim i përbashkët i qeverisë shqiptare dhe Bashkimit Europian në kudër të projektit IPA. Ministri Lleshaj tha se policia është pajisur me 196 automjete të tjera, nga të cilat 49 xhipa për policinë kriminale dhe 96 mikrobuza për policinë e rendit. Vlera e investimi është 8.1 milionë euro nga të cilat 4.8 nga ana e Bashkimit Europian dhe 3.3 nga qeveria shqiptare.
Kryeministri Rama tha se gjendja e policisë disa vite më parë ishte e mjerueshme dhe premtoi se Policia do të ketë dhe kapacitete teknologjike e dixhitale si dhe drona të fjalës së fundit.
”Shumë faleminderit për bashkëpunimin. Ky kontribut i përbashkët, ku padiskutim kontributi i BE është i konsiderueshëm veç kontributit të qeverisë. Ne po e transformojmë rrënjësisht Policinë dhe vendin.
Disa vite më parë ishte e paimagjinueshme. Policia e shteti ishte në gjendje të mjerë. Flota motorike e Policisë ishte qesharake. Sot ne ju japim të gjithë punonjësve fuqi motorike. Një flotë të tërë mjetesh që do të mundësojnë kushte optimale për operacione speciale dhe të rrezikshme. Nuk mbaron këtu. Ne duam të shkojmë më tutje. Duam të rrisim kapacitetet teknologjike e dixhitale. Mjete më të sofistikuara, drona të fjalës së fundit.”- tha Rama.
Soreca nga ana tjetër tha se BE gjatë këtij viti do të japë 19 milionë euro për Policinë shqiptare, dhe një pjesë e tyre janë pikërisht për këto automjete. /Opinion.al
