E vogla Asel, e cila erdhi në jetë 47 minuta pas mesnatës së Vitit të Ri, është foshnja e parë e vitit 2018 në Vjenë të Austrisë.
Por në vend të urimeve të rastit, fëmija është pritur nga një valë me deklarata raciste, urrejtjeje dhe fyerjesh, vetëm sepse është vajza e një çifti myslimanësh, Naime dhe Alper Tamga. Në foton e zakonshme të rastit në spital, e publikuar nga mediat kryesore austriake, Asel mbahet në krahë nga nëna, e cila është e mbuluar me shami në kokë.
Në faqet sociale të gazetave lokale, janë vërejtur komente të panumërta raciste. “Shpresoj që të vdesë”, – arriti të shkruajë dikush në “Facebook”. “Dëbojeni këtë familje menjëherë”, – ka shkruar një tjetër, sipas asaj që raporton “New York Times”, e cila e ka cilësuar reagimin e njerëzve në internet një skandal pas mesazheve raciste. E vogla Asel madje, akuzohet se do të jetë një “terroriste e ardhshme”.
Shoqatat që punojnë për mbrojtjen e emigrantëve dhe refugjatëve dhe për të drejtat në ueb, thonë se nuk e kanë parë asnjëherë një gjë të tillë. Mes çudisë dhe shqetësimit, operatorët që punojnë me emigrantët e huaj, komentojnë valën e urrejtjes drejt një të sapolindure në Austri, shtet që drejtohet nga një qeveri me prirje të djathta ekstremiste.
Sekretari i Përgjithshëm i filialit vjenez të Caritas-it, Klaus Schwertner, shkruan në “Facebook”: “Në orët e para të lindjes, ky fëmijë i ëmbël është shënjestruar nga një valë komentesh të dhunshme, plot urrejtje. Është një dimension totalisht i ri i urrejtjes ‘online’, që shënjestron një të sapolindur të pafajshëm”.
Funksionari i Caritas-it, ka lëshuar një apel, ku të dërgohen dhe publikohen mesazhe mbështetjeje për beben e parë të 2108-ës në Austri: një ftesë e ndarë prej disa ditësh nga 10 mijë persona./Opinion.al
