Vetëm disa javë më parë policia e Queensland-it nisi një zinxhir hetimesh për një nga skandalet më të rënda që kishin denoncuar konsumatorët australianë: prania e gjilpërave metalike në luleshtrydhe. Mesa duket, historia po përsëritet. Kësaj here mori përmasa akoma më të mëdha pasi mund të vinte në rrezik jetën e një fëmije 2-vjeç. Gjithçka ka nisur nga apeli në Facebook i Kayleigh Smith, një gruaje britanike e cila jeton prej vitesh në Australi. Mamaja 30-vjeçare nuk e kishte marrë kurrë me mend që brenda bebelinës Pampers, që kishte përdorur për të tre fëmijët e saj ndër vite, do të gjente një gjilpërë.
Postimi:
“Nuk mund ta besoj ç’po më shohin sytë. Dje u ndala për të bërë pazaret në një dyqan afër shtëpisë. Bleva edhe disa bebelina Pampers pasi ato që kisha nuk mjaftonin. Kur u ktheva në shtëpi, ishte fiks orari për të ndërruar Freddie-n dhe mora një pakoja e pahapur. Nuk kishin kaluar as 10 minuta, kur dëgjoj tim bir duke qarë e ulëritur. Ai m’u afrua dhe ma bëri me shenjë se diçka nuk shkonte tek pantallonat e tij. Ia hoqa menjëherë dhe të njëjtën gjë bëra edhe me bebelinën. Teksa e kontrolloja së jashtmi, u habita nga ajo që preka me dorë : një gjilpërë. U këshilloj të gjithë prindërve të tregohen të kujdesshëm para së t’i përdorin për fëmijët e tyre. Freddie është mirë, thjesht ka disa gërvishtje dhe skuqje të lëkurës. Por, situata mund të kishte shkuar akoma më keq”.
Pasi postimi i Kayleigh u shpërnda mbi 20 mijë herë, ka ardhur edhe reagimi i parë i një prej zëdhënësve të Pampers:
“Na vjen shumë keq për atë që ka ndodhur. Akoma nuk mund ta besojmë që brenda një produktit tonë, i certifikuar dhe i testuar në institutet më të mira botërore, është gjetur një gjë e tillë. Qëllimi ynë kryesor është t’i ofrojmë siguri klientit. Kompania jonë po ndjek me vëmendje hetimet e këtij rasti”.
