Ka shkuar në 15 numri i viktimave nga sulmi i armatosur në Bondi Beach në Sydnei të Australisë, ndërsa dhjetëra persona të tjerë mbeten të shtruar në spital. Sulmi, i cilësuar nga autoritetet si terrorist, kishte në shënjestër komunitetin hebre australian gjatë një aktiviteti për festimin e Hanukkah-ut.
Viktima më e re ishte një vajzë 10-vjeçare, Matilda, e cila ndërroi jetë në spital nga plagët e marra. Mes të vrarëve ishte edhe një rabin i lindur në Britani, Eli Schlanger, si dhe një i mbijetuar i Holokaustit, i cili humbi jetën duke mbrojtur bashkëshorten e tij.
Sipas policisë, autorët e dyshuar ishin një baba 50-vjeçar dhe djali i tij 24-vjeçar. Babai u qëllua për vdekje nga policia në vendngjarje, ndërsa djali mbetet në gjendje kritike në spital. Autoritetet konfirmojnë se burri kishte një leje për armë zjarri për gjueti rekreative dhe ishte pjesë e një klubi armësh.
Mediat ndërkombëtare raportojnë se agjencia australiane e sigurisë, ASIO, kishte ekzaminuar më parë djalin dhe kishte vlerësuar se ai nuk përbënte kërcënim për përfshirje në dhunë.
Pas sulmit, qytetarë të shumtë janë mbledhur buzë plazhit për të vendosur lule dhe për të nderuar viktimat.
Komuniteti mysliman në Australi e kanë dënuar ashpër sulmin, duke theksuar se antisemitizmi dhe dhuna nuk kanë vend në shoqëri dhe duke shprehur solidaritet me komunitetin hebre.
Ndërkohë kryeministri Anthony Albanese ka njoftuar se qeveria do të shtyjë përpara ligje edhe më të ashpra për armët, përfshirë kufizime kohore për licencat, pavarësisht se Australia tashmë ka disa nga rregullat më të forta për armë zjarri në botë.
