Pasditen e sotme gazetari investigativ Artan Hoxha ka dhënë dëshminë e tij në Policinë e Tiranës në lidhje me një audio të zbuluar nga protesta e 21 janarit në vitin 2011, ku mbetën të vrarë katër qytetarë.
Hoxha deklaroi për gazetarët se detyrat i është lënë policisë gjyqsore, ndërsa shtoi me ironi se është veshur trashë pasi është i përgatitur për të qëndruar gjatë në këto ambiente.
Sakaq, ai shtoi se çfarë ka qenë për tu bërë publike është bërë nga ana e tij, ndërsa bëri thirrje për marrjen e një përgjigje për familjarët e viktimave Aleks Nika dhe Hekuran Deda të cilët sipas tij “janë ekzekutuar publikisht me urdhër” dhe ende nuk kanë autorë.
“Unë i jam përgjigjur thirrjes që ka bërë prokuroria që po heton. Me sa pashë detyra I është lënë policisë gjyqësore. Duke ndjekur fjalën e avokatit Maks Haxhia për tu veshur trashë në kohë dimri këtu, unë jam veshur me triko leshi, pallto, jam i përgatitur për të qëndruar gjatë. Çfarë ka qenë për tu bërë publike është bërë nga unë, tani mbetet në dorën e hetimit, janë ata që e vlerësojnë nëse është një provë, nëse mund të jetë një element që ndihmon grupin e hetimit për zbardhjen e 21 janarit. Sot është fakt se edhe 12 vite mbrapa kemi 2 të vrarë në bulevard, Hekuran Dedën dhe Aleks Nikën që janë ekzekutuar dhe janë pa autorë. Sot ish kryeministri i kohës duhet të japë përgjigje, ai vazhdon me variantin e vjetër, që ka dalë një Carlo Gambino prapa, që garda ka zbatuar ligjin e armëve, por mua me rezulton se garda ka ekzekutuar me urdhër qytetarë të pafajshëm. Ka vrarë qytetarë. Për sa kohë këto vrasje janë pa autorë, duhet të kemi përgjigje”,- tha Hoxha.
