Hasi është një ndër zonat më të varfra në vend, ku papunësia dhe varfëria shënon shifra alarmante. Me gjithë varfërinë e tejskajshme, kryesisht nëpër fshatra, banorëve u është dashur të presin disa muaj për të marrë ndihmën ekonomike që varion jo më shumë se 3 mijë apo 4 mijë lekë.
Banorët mbetën fillimisht dyerve të Bashkisë, pasi nuk mundën ta marrin ndihmën për tre muaj, nga 25 dhjetori 2016 deri në mesin e muajit mars 2017.
Por pas shpërndarjes në mars, ata janë përballur me një tjetër fakt për të cilin nuk gjetën dot një shpjegim zyrtar: Ndihma ekonomike u ishte përgjysmuar pa asnjë argument apo paralajmërim.
Pasi askush nga punonjësit e Bashkisë nuk u dha një informacion të saktë se pse u është përgjysmuar shuma e parave që duhej të merrnin, banorët e prekur kanë kërkuar ta denoncojnë rastin në media.
Ata kanë kontaktuar gazetarin Isa Myzyraj, të cilit i kërkuan ndihmë për zbardhjen e këtij skandali.
Por teksa gazetari ka kërkuar të investigojë atë çka kishte ndodhur, ai është kërcënuar nga punonjësit e Bashkisë dhe më pas, edhe nga vetë kryetari i këtij institucioni, Adem Lala i LSI-së. Kryebashkiaku i kërkoi atij të tërhiqej nga investigimi, në të kundërt ai (gazetari) do të çuditej edhe vetë se çfarë do t’i ndodhte në vijim.
Panorama publikon biseden e plote ku kryebashkiaku Adem Lala e kërcënon dhe i kërkon Isa Myzyrajt të tërhiqet dhe të mos merret me këtë punë. Veç kërcënimeve, në bisedë kryetari Lala përdor fjalor fyes ndaj tij.
