Ditën e sotme Durrësi u trondit nga një atentat mafioz ndaj prokurorit Arjan Ndoji në “Mbikalimin e Shkozetit”. Së bashku me prokurorin mbetën të plagosur dhe dy persona të tjerë, Aleksandër Laho, i njohur si Landi Muharremi dhe Andi Maloku.
Ndërkohë, në lidhje me gjendjen e të plagosurve ka folur mjeku i urgjencës në spitalin Rajonal të Durrësit, Arjan Tivari. Ai shprehet se se Ndoj ndodhet jashtë rrezikut për jetën, ndërsa ka marrë frakturë të klavikulës (afër shpatullës).
Ndërsa Aleksandër Laho, i njohur si Landi Muharremi, ndodhet në sallën e operacioneve, për shkak të dëmtimeve që ka marrë në nofull.
“Jam mjeku i urgjencës në spitalin rajonal Durrës. Më hollësisht duhet të fliste një kirurg. Me një prej të sëmurëve është duke u punuar në sallën e operacioneve. Prokurori është jashtë rrezikut për jetën, me një frakturë të klavikulës. Ndërkohë, një person është nisur drejt Tiranës. Prokurori është në reaminacionin e spitalit, në gjendje të mirë shëndetësore. Ndërsa personi tjetër ka dëmtim të nofullës. Personi i tretë u dërgua në Tiranë, pasi gjendja e tij ishte e rëndë”, tha mjeku Arjan Tivari.
Ndërkohë mësohet se në gjendje të rëndë shëndetësore ndodhet shoferi i prokurorit, Andi Maloku, i cili është transportuar në spitalin e Traumës në Tiranë për mjekim të specializuar.
Policia nuk ka asnjë person të arrestuar në lidhje me ngjarjen, ndërsa janë shoqëruar disa persona në Durrës të cilët mund të kenë lidhje me ngjarjen. Deri më tani dyshohet se objektivi ka qenë prokurori dhe se atentati është bërë për shkak të detyrës./ Opinion.al
