Grupi hetimor i ngritur për atentatin e Lushnjes, ku humbën jetën dy persona dhe u plagosen dy të tjerë, nuk përjashtoi dyshimin se shënjestër e atentatit të ketë qenë Sajmo (Sajmir) Xhelili.
Xhelili arriti t’i shpëtojë mrekullisht atentatit, pasi reagoi në kohë dhe u largua me shpejtësi.
Burimet policore thanë se ai u është bashkuar viktimave, Zamir Latifi dhe Jurgen Hoxha, vetëm pak minuta pasi ka ikur Xhulio Shkurti.
Sipas grupit hetimor, Xhelili është një ndër dëshmitarët kyç të ngjarjes. Mësohet se ai ka treguar se nuk ishin ulur në lokal gjatë momentit të atentatit, ndryshe nga sa u tha fillimisht.
“Ne nuk ishim ulur në kafe. Po rrinim te një pemë në anë të rrugës. Xhulio sapo kishte ikur. Ne po bisedonim në këmbë kur një makinë ndaloi pak metra më larg (rreth 20 metra) dhe që atje doli një person me maskë të zezë në kokë, në duar mbante një armë automatike. Kur u afrua nja 6 a 7 metra, unë u largova me vrap pas ndërtesave. Të tjerët nuk mundën. Autori hapi zjarr dy herë me breshëri kallashnikovi, pastaj u fut në makinë dhe u larguan”, mësohet të ketë thënë në Polici Sajmir Xhelili.
Sipas të dhënave të Policisë, janë sekuestruar kamerat e disa bizneseve nga ku po hetohet dinamika.
Ata që kanë qëlluar me armë kanë qenë Laert Haxhiu dhe Orges Bilbili. Ndërsa një person tjetër i tretë ka shërbyer si drejtues i mjetit, që më pas u gjet i djegur në aksin Lushnjë-Berat.
Burimi: Panorama
