Nuk ka ende asnjë person të dyshuar dhe asnjë pistë zyrtare për hetimet që po zhvillohen për atentatin e dyfishtë në Durrës mesditën e djeshme ku mbeten të vdekur Ervin Dalipaj person i shpallur në kërkim për vrasje dhe Juxhin Dauti i dënuar për vrasje.
Sipas policisë janë shoqëruar deri tani 18 persona për tu pyetur në lidhje me ngjarjen e rëndë. Po kështu policia thotë se ndaj tyre janë shkrehur 32 plumba. Detaje, policia jep edhe për sendet e sekuestruara. Bëhet e ditur se në makinë kishte 7 mijë euro dhe një 1 psitoletë. Përkatësisht 5 mijë euro dhe pistoletë Dalipaj dhe 2 mijë euro Dauti.
Njoftimi i policisë
Më datë 25.04.2017, rreth orës 13:40, në autostradën Durrës-Tiranë, në afërsi të vendit të quajtur”Mbikalimi i Sukthit”, në automjetin tip Audi S8, janë gjetur të vrarë me armë zjarri shtetasit Ervin Dalipaj 38 vjeç, banues në Tiranë, (i shpallur në kërkim për veprën penale të “Rrëmbimit të Personit”) dhe Xhino Dauti 27 vjeç, banues në Tiranë (i dënuar më parë për vrasje).
Me të marrë njoftim menjëherë në vendngjarje shkuan Efektivet e Policisë, të cilët kqyrën vendin e ngjarjes, gjetën dhe sekuestruan në cilësinë e provave materiale:
32 copë gëzhoja, model 56, kalibër 7.62 mm;
një predhë bërthame;
në pjesën e brendshme të automjetit Audi S8 u gjetën një armë zjarri pistoletë model 54, 15 fishekë, disa aparate telefoni celularë të markave të ndryshme si dhe një sasi prerje në valutë të huaja (euro).
Nga ana e uniformave blu janë shoqëruar 18 persona, me qëllim zbardhjen dhe zbulimin e plotë të ngjarjes.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale ”Vrasja në rrethana të tjera cilësuese” dhe ”Prodhimi dhe mbajtja pa leje e armëve luftarake dhe e municionit ” parashikuar në nenet 79/dh dhe 278 të Kodit Penal.
