Të tjera detaje mësohen rreth Inez Hajrullës, 25 vjeçarit që iu bë atentat dje në Vlorë. Ai po kalon orë të vështira në Spitalin e Traumës në Tiranë pasi ka humbur të dyja këmbët.
Edhe pse ka mbetur i plagosur rëndë, policia komunikoi masën e arrestit ndaj tij pasi në makinë u gjet një çantë brenda së cilës kishte një armë zjarri pistoletë tip “Glock”, me fishekë në fole dhe 17 fishekë në krëhër.
Zyrtarisht policia ende nuk ka folur për ndonjë pistë hetimi, por televizioni “ABC News” raporton se 25 vjeçari Hajrulla, është i afërm me Renato Imerin i vrarë në datë 31 korrik pranë një lokali në Lungomare.
Gjithashtu ai është kushëri edhe Endri Çaushit i vrarë në Durrës para dy vitesh. Të dyja këto ngjarje i janë bashkangjitur dosjes së hetimeve, për të mësuar nëse atentati ka lidhje apo jo me këto dy vrasje.
Shpërthimi në të cilin mendohet se u përdorën 300 gramë tritol, ndodhi mëngjesin e së hënës pranë degës së Sigurimeve Shoqërore, në lagjen “Hajro Çakërri”, tek Bishti i Kalldrëmit. Makina lëvizi 70 metra dhe më pas u godit me një tjetër automjet të parkuar në zonë. /ABCNEWS
