Kreu i Grupit Parlamentar të Partisë Demokratike, Gazment Bardhi ka reaguar në lidhje me ngjarjen e rëndë të ndodhur në Shkodër, ku humbën jetën disa persona.
Përmes një postimi në rrjetet sociale, Bardhi shkruan ky është një atentat mafioz i ndodhur në mes të qytetit.
Sipas Bardhit, kjo ngjarje do të ishte parandaluar nëse Policia e Shtetit do ishte e fokusuar në punën e saj dhe jo të merrej me përndjekjen politike të çdo kundërshtari të Edi Ramës.
Postimi i plotë i Bardhit në platformën “X”:
Në Shkodër, në mes të qytetit, ndodh një atentat mafioz me disa të vrarë dhe disa të plagosur, ngjarje që nëse Policia do ishte e fokusuar në punën e saj mund dhe duhet të ishte parandaluar.
Ndërkohë, Policia e Shtetit është e zënë me përndjekjen politike të çdo kundërshtari të Edi Ramës, deri në absurditetin e “arrestimit” edhe të makinave.
Është një akt kriminal nxjerrja e Policisë së Shtetit jashtë funksioni! Kjo sjell cënim të sigurisë publike dhe akte të rënda si kjo e sotmja. Policia e Shtetit që supozohet të luftojë krimin, është shndërruar në mbrojtëse e krimit dhe në vegël në dorën e tij për të goditur opozitën!
