Policia e Tiranës ka identifikuar autorin e ngjarjes së rëndë që ndodhi në Laprakë të mërkurën në mbrëmje dhe e ka shpallur në kërkim.
Emri i tij nuk bëhet i ditur për arsye hetimore, ndërsa është ushtruar kontroll në banesën e tij në kryeqytet.
Nga hetimet e deritanishme është mësuar se autori ka pasur një konflikt me 23-vjeçarin Erion Benga, i cili mbeti i plagosur. Mësohet se sherri ka ndodhur për motive banale.
Autori i dyshuar kishte ngacmuar 17-vjeçaren e cila ndodhej me Erion Bengën në momentin e krimit. Benga debatoi ashpër me të dyshuarin dhe më pas u largua nga lokali ku ndodhej në zonën e Laprakës në Tiranë.
Të rinjtë sapo kishin dalë nga lokali në këtë zonë, ishin drejtuar për tek makina, që e kishin parkuar diku mes pallateve.
Në momentin që 23-vjeçari dhe adoleshentja Briselda Gjinkola u futën në makinë, ende pa e ndezur mjetin, pranë dy të rinjve shkuan dy persona, të maskuar, ndërsa nisën të qëllonin me pistoletë në pjesën anësore të mjetit dhe më pas në pjesën e pasme.
Plumbat depërtuan xhamin anësorë dhe të pasmë të makinës dhe prekën në kokë 17-vjeçaren, ndërsa në shpatull Erion Bengën.
Pikërisht ky i fundit dërgoi me makinë në Spitalin e Traumës shoqen e tij. Fatkeqësisht, Briselda Gjinkola ndërroi jetë për shkak të plagëve. Ndërsa 23-vjeçari ka mbetur i plagosur dhe po merr trajtim mjekësor.
Hetuesit pritet të marrin në pyetje Bengën sapo ky i fundit të jetë në gjendje për të folur.
Uniformat blu të kryeqytetit kanë analizuar edhe kamerat e sigurisë që ndodhen në zonën ku u regjistrua krimi.
Në vendngjarje u sekuestruan 4 gëzhoja pistolete, ndërsa autori i dyshuar është ende në kërkim policor.
