Detaje të reja dalin në dritë nga atentati ndaj biznesmenit Ardian Gjeloshi i ndodhur mëngjesin e së shtunës 10 shkurt në firmën e inerteve në fshatin Gures të Kurbinit.
Nga breshëria e plumbave humbi jetën ekonomisti i firmës Selman Mihana, rreth 70-vjeç, ndërsa vetë pronari Ardian Gjeloshi u plagos.
Mësohet se ndaj dy personave kanë qëlluar 3 persona, ndërsa në atentat dyshohet se kanë marrë pjesë 7 persona.
Sipas Klan Neës, Gjeloshi ishte nën monitorim prej disa ditësh me dron spiun. Autorët kanë shkuar në kompani me makina Range Rover, dhe ishin të kamufluar si policë.
Ekspertët e policisë kanë marrë në pyetje 51-vjeçarin, i cili ka pohuar se nuk ka konflikte me asnjë.
Burime pranë grupit hetimor bëjnë me dije se ditën e djeshme janë gjetur dy makina të djegura pranë urës së Milotit, që dyshohet se ju përkasin autorëve të ngjarjes.
Policia po heton dhe është e fokusuar në tre pista kryesore për zbardhjen e kësaj ngjarje të rëndë në Gurëz të Kurbinit. Pista e parë ku janë përqendruar hetimet ka të bëjë me konfliktet në lidhje me biznesin me pjesëtarë të një fisi nga fshati Pllanë i Lezhës.
Por policia nuk ka përjashtuar edhe pistën e hakmarrjes pasi në vitin 2002 Ardian Gjeloshi dhe vëllai i tij, Dritan Gjeloshi qëlluan mbi një kamionçinë dhe lanë të vrarë Marie Prengën, infermiere, nënën e 4 fëmijëve, ndërsa u plagosën oficeri i FNSH, Kastriot Prenga dhe Gjergj e Vitore Prenga.
Ndërsa një tjetër çështje ku po fokusohen hetimet është edhe plagosja e djalit të Ardian Gjeloshit. Policia ka sekuestruar kamerat e sigurisë së biznesit dhe hetimet vijojnë ndërsa autorët ende mbeten në kërkim.
