Detaje të reja janë zbardhur rreth atentatit të dy ditëve më parë në Fushë-Krujë, ku mbetën të vrarë Brilant Martinaj, Diklen Vata dhe Besmir Hoxha.
Në një dëshmi të dhënë nga familjarët e Diklen Vatës bëhet me dije se tre të rinjtë e kishin vënë re se po ndiqeshin nga persona të panjohur. Këtë gjë ai ia kishte dëshmuar nënës dhe motrës së tij, i cili pas një komunikimi me telefon iu kishte thënë se ndiqeshin nga persona të paidentifikuar.
Ndërkohë nga kamerat e sigurisë dhe pas dëshmisë së dhënë nga shoku i viktimave është zbuluar intinerari i fundit që kanë përshkuar përpara se të ndodhte ngjarja.
Në dëshminë e shokut të 3 viktimave thuhet se ata gjatë paradites kanë qenë në një lokal në Rinas, ndërsa në mesditë ishin në një restorant të njohur afër mbikalimit të Fushë-Krujës. Në këtë vend ata kanë parkuar makinën tip “Volkswagen Passat” dhe më pas janë larguar me makinën e një shokut të tyre në një servis në Kamëz ku kishin lënë një tjetër makinë për riparim.
Për shkak se makina e lënë në servis nuk ishte riparuar, ata janë kthyer me të njëjtin mjet deri tek restoranti ku kishin parkuar makinën tip “Volkswagen Passat”.
Vetëm pak minuta më vonë, pasi dolën nga aty janë nisur drejt mbikalimit të Fushë Krujës ku dhe u ndeshën me breshërinë e plumbave.
Ndërkohë, nga grupi hetimor mendohet se automjeti që u gjet i djegur 12 orë pas atentatit, në fshatin Ahmetaq të jetë i autorëve dhe pse verifikimet s’kanë mbaruar akoma.
Kujtojmë se tre të rinjtë u ekzekutuan me breshëri plumbash mesditën e së dielës në mbikalimin e Fushë-Krujës. Ndërsa, pista kryesore vijon të jetë përplasja mes grupeve kriminale dhe se personat e dyshuar dhe që mund të kenë dijeni për ngjarjen nga Fushë-Kruja dhe Nikla prej gati një jave rezultojnë të jenë larguar nga vendi në mënyre të rregullt. Kjo është vërtetuar nga sistemi TIMS.
