Të tjera detaje janë zbardhur lidhur me vrasjen e Ardjan Çollakut dhe Lulzim Bitrit gjatë orëve të mbrëmjes në Elbasan.
Mësohet se në makinën e djegur janë gjetur dhe dy armët që u përdorën në atentat. Sipas informacioneve armët janë të modelit kallashnikov dhe një automatik tjetër tip “Scorpions”.
Bitri dhe Çollaku u qëlluan me armë zjarri në hyrje të një lokali, pranë një karburanti. Autorët që ndodheshin në një makinë, i kanë ndjekur dhe kanë pritur momentin që objektivat të dilnin nga mamikna. Pasi i qëlluan me armë për vdekje, autorët ende të paidentifikuar janë larguar me shpejtësi nga vendi i ngjarjes dhe dogjën makinën në një rrugicë pranë metalurgjisë.
Kush është Ardjan Çollaku?
Ardian Çollaku, i cili mbeti viktimë nga të shtënat me armë zjarri mbrëmjen e djeshme në Elbasan nuk është emër i panjohur për policinë. Burime bëjnë me dije për gazetarin e ABC Aldo Kozarja se ai ka qenë i arrestuar për trafik të lëndëve narkotike por edhe për dhunë në familje. Më herët Çollaku kishte qenë i dënuar edhe në shtetin italian për trafik narkotikësh. Pasi është arrestuar nga autoritetet shqiptare, ai ishte ekstraduar drejt Italisë për të vuajtur dënimin. Viktima rreth 50-vjeç ishte baba i dy djemve ndërsa kishte përdorur në të shkuarën edhe mbiemra të tjerë, ndër to edhe Subashi. Sipas informacioneve paraprake ai nuk ishte i skeduar si pjesë e ndonjë grupi kriminal ndërsa deri më tani dyshimet kryesore lidhen me të shkuarën kriminale dhe dënimin në Itali në fushën e narkotikëve.
Kush është Lulzim Bitri?
Lulzim Bitri njihet si mik i Talo Çelës. Ky i fundit është person i shpallur në kërkim kombëtar dhe ndërkombëtar. Çela është autori i dyshuar i grabitjes së 9 prillit 2019, ndodhur në pistën e aeroportit “Nënë Tereza”, në Rinas, Tiranë, ku persona të maskuar, nën kërcënimin e armëve të zjarrit, kanë arritur të vjedhin një sasi të konsiderueshme vlerash monetare të cilat po ngarkoheshin në avion dhe më pas gjatë shkëmbimit të zjarrit me Policinë, mbeti i vrarë njëri prej autorëve kryesorë të kësaj ngjarjeje. Gjithashtu Çela dyshohet se fshihet pas atentatit me armë zjarri të 2 vëllezërit Haxhia në Durrës.
