Pak ditë më parë Shqipëria u trondit nga atentati i bërë ndaj prokurorit Arjan Ndoj dhe dy personave të tjerë që udhëtonin në makinën e tij në vendin e quajtur “Mbikalimi i Shkozetit” në Durrës.
Ndërkohë policia ka vijuar hetimet për identifikimin dhe kapjen e autorëve, ndërsa deri më tani ka shoqëruar disa persona të cilët dyshohet se mund të jenë autorët ose mund të kenë dijeni për atentatin.
Policia ka kryer kontrolle blic në disa banesa në Durrës, Tiranë dhe në Fushë Krujë. Mësohet se gjatë kontrollit në banesat e personave të dyshuar si autorë janë gjetur armë dhe municione. Megjithatë, mësohet se ende nuk ka një emër konkret edhe pse janë shoqëruar në polici mbi 20 persona.
Dyshohet se në këtë atentat objektivi ka qenë prokurori Ndoj si dhe Landi Muharremi, ndërsa Andi Maloku, i cili gjithashtu mbeti i plagosur, ishte shoferi i prokurorit.
Prokuroria e Krimeve të Rënda, e cila po heton mbi motivet dhe autorët e atentatit ka ngritur pistat e para. Ka dyshime se atentati të ketë qenë i porositur dhe pistat kanë lidhje me ngjarje kriminale dhe ato që lidhen me dosjet e pronave.
Në cilësinë e provës materiale, prokurorët kanë marrë të gjitha dosjet e fundit që ka pasur në shqyrtim Ndoj. Prokurori i plagosur dhe një dëshmi pak minuta pas ngjarjes, por autoritetet ende janë të paqarta në lidhje me situatën dhe për këtë arsye do e ripyesin.
Po ashtu, pas përmirësimit të dy të plagosurve të tjerë, Landi Muharremit dhe Andi Malokur, Prokuroria do u marrë dhe atyre dëshminë të cilat mund të ndihmojnë në zbardhjen e plotë të ngjarjes./ Opinion.al
