Policia e Shtetit ka vendosur një shpërblim prej 20 mijë Eurosh për këdo që jep informacion për autorët e masakrës së Don Boskos ku u vra një grua dhe u plagosën 5 të tjerë.
Në një njoftim për mediat, Policia ka vënë në dispozicion të qytetarëve numrin e telefonit 069 41 11 546, për informacionet që ata mund të kenë.
Ndërkaq, bëhet me dije se grupi i posaçëm hetimor, ka vazhduar kryerjen e veprimeve në vendin e ngjarjes, ku janë gjetur dhe sekuestruar prova të tjera materiale të vlefshme për hetimin, si dhe janë pyetur të plagosurit dhe dëshimtarët okularë dhe janë sekuestruar pamjet filmike.
Ndërsa sa i takon makinës së autorëve të gjetur në vendin e quajtur “Ura e Sul Meres”, në territorin e fshatit Likmetaj, grupi hetimor ka sekuestruar disa prova të vlefshme për hetimin.
Nga verifikimi i numrit të shasisë së automjetit rezulton se ky mjeti tip BMW është vjedhur më 14.03.2021, në lagjen nr 13 Durrës.
Të gjitha provat metariale të sekuestruara në vendngjarje në rrugën “Anastas Shundi” dhe në fshatin Likmetaj, janë dërguar në Institutin e Policisë Shkencore ku po u nënshtrohen ekzaminimeve të mëtejshme./Opinion.al
