Gjykata e Posaçme ka vendosur të kalojë për gjykim dosjen në ngarkim të Redian Rrajës dhe Ariol Halilajt, të akuzuar për atentatin ndaj prokurorit Arjan Ndoja, shokut të tij Aleksandër Laho, i njohur si “Rrumi” dhe Andi Malokut, shoferi 24-vjeçar, që humbi jetën pak ditë më vonë në spital.
Rraja dhe Halilaj do të përballen në gjykatë me akuzën e “vrasjes së funksionarëve publikë”, mbetur në tentativë në dëm të Ndojës, “vrasje në rrethana cilësuese” ndaj Malokut dhe vrasje e mbetur në tentativë ndaj Lahos, si edhe “armëmbajtje pa leje”, “grup i strukturuar kriminal” dhe “kryerje e veprave penale nga grupi i strukturuar kriminal”.
Atentati ndodhi më 1 nëntor 2019, rreth orës 16:00, në autostradën Durrës-Tiranë, në afërsi të mbikalimit të Shkozetit, disa persona me një automjet Benz, ngjyrë gri, që mbante të vendosur targën AA342LM qëlluan më armë zjarri në drejtim të automjetit me targë AA333ZD, me të cilin udhëtonin shtetasit Andi Maloku, Arjan Ndoja dhe Aleksandër Laho
Nga të shtënat, këta perosna mbetën të plagosur, por në spital shtetasi Andi Maloku humbi jetën, kurse shtetasit Arjan Ndoja dhe Aleksandër Laho arritën të mbijetonin./Opinion.al
