Gjykata e Lartë ka lënë të pandryshuar masën e sigurisë “arrest në burg” dhënë nga Apeli për Redian Rrajën, i dyshuar si atentator i prokurorit të Durrësit, Arjan Ndoja, në atentatin e 1 nëntorit pranë mbikalimit të Shkozetit.
Kolegji tre anëtarësh ka vendosur të mos pranojë rekursin e paraqitur nga Rraja pasi sipas tyre nuk përmbante asnjë nga shkaqet ligjore për të cilat mund t’i drejtohesh Gjykatës së Lartë.
Në kundërshtimin e paraqitur në Gjykatën e Lartë, 34-vjeçari pretendonte se dy vendimet e shkallëve më të ulëta që e lanë në qeli ishin haptazi në kundërshtim me ligjin, pasi sipas tij nuk kishte asnjë provë, që mund të ngrinte dyshime për përfshirjen e tij në krim.
Redian Rraja akuzohet për pesë vepra penale mes të cilave “vrasje e funksionarëve publikë”, mbetur në tentativë dhe “grup të strukturuar kriminal”.
Përveç tij, për atentatin ndaj prokurorit është arrestuar dhe lënë në burg si i dyshuar edhe Arjol Halilaj./Opinion.al
