Në atentatin e mbikalimit të Shkozetit ku mbeti plagosur prokurori Arian Ndoja u qëllua me dy kallashnikovë por këto nuk ishin të vetmet armë që autorët kishin me vete.
Në laboratorin shkencor është ekzaminuar edhe një pistoletë e sofistikuar titan me silenciator e cila është gjetur në automjetin e braktisur në Shkafane të Ishmit.
Burime nga grupi hetimor thonë se prania e kësaj arme tregon se autorët ishin përgatitur për ta kryer atentatin edhe në rrethana të tjera. Gjithashtu pohohet se atentatorët nuk e kanë djegur dot makinën sepse bagazhi ku ndodheshin shishet e benzinës nuk ishte hapur.
Pasditen e 1 nëntorit, nga breshëria e plumbave në afërsi të mbikalimit të Shkozetit mbeti i plagosur prokurori i Durrësit Arian Ndoja, miku i tij Aleksandër Laho alias Pëllumb Muharremi ose i njohur ndryshe si “Rrumi” dhe ndërroi jetë 24-vjeçari Andi Maloku i cili drejtonte mjetin.
I arrestuar i vetëm për këtë ngjarje është Redjan Rraja, kushëri i deputetit Rrahman Rraja.
Prokuroria e Krimeve të Rënda ende nuk ka një përgjigje sa i takon objektivit të atentatit por ndërkohë prokurorët e çështjes Anton Martini dhe Besim Hajdarmataj kanë shqyrtuar të gjithë dosjet e pronave në gjirin e Lalëzit për të verifikuar përfshirjen e mundshme të prokurorit Ndoja.
Nga ana tjetër, Prokuroria e Përgjithshme ka nisur një hetim ndaj tij pasi dyshon se ofron konsulencë ligjore, gjë e cila është e ndaluar për statusin e tij të prokurorit. /Opinion.al
