Një ditë pasi Prokuroria e Posaçme kundër Krimit të Organizuar dhe Korrupsionit (SPAK) kërkoi burg përjetë për Redjan Rrajën janë zbuluar detaje të reja lidhur me atentatin ndaj ish-prokurorit Arjan Ndoj. Rraja akuzohet nga prokuroria si ekzekutor në atentatin e ndodhur në nëntor të vitit 2019 pranë mbikalimit të Shkozetit, në aksin rrugor Durrës-Tiranë.
Sipas Shqiptarja.com 300 mijë euro do të paguheshin në laboratorin e Policisë Shkencore për të shkatërruar provat. Konkretisht bëhet fjalë për shkatërrimin e ADN-së të Redjan Rrajës.
Ky fakt, raporton po Shqiptarja.com u bë i ditur nga vetë SPAK gjatë leximit të konkluzioneve përfundimtare para gjykatës. Do ishte Plarent Dervishaj, i cili akuzohet si organizatori i atentatit ndaj ish prokurorit Arjan Ndoja në Durrës, që do të bënte pagesën prej 300 mijë eurosh. Sipas SPAK, kjo gjë do të bëhej për ti lehtësuar Rrajës pozitën në gjykatë. Ndërsa prokurorët kanë zbuluar se kjo bisedë për shkatërrimin e ADN-së së Rrajës është bërë në komunikimet që ka pasur grupi kriminal në aplikacionin ‘SKY’.
Shenjat e gishtërinjve të Redjan Rrajës u gjetën në një palë syze të cilat ndodheshin në makinën e autorëve.
Në atentatin ndaj ish-prokurorit Arjan Ndoj mbeti i plagosur ish-prokurori, miku i tij Aleksandër Laho, i njohur edhe me emrin Pëllumb Muharremi, si dhe shoferi Andi Maloku, i cili ndërroi jetë pas disa ditësh në spital./Opinion.al
