Detaje të reja mësohen nga atentati me armë zjarri ndaj biznesmenit në Lezhë, Aleksandër Deda, i njohur si “Leksi i druve”.
Alkesandër Deda, u qëllua me breshëri plumbash, gjatë udhëtimit me makinën e tij. Sipas “News 24” autorët janë larguar me një mjet, i cili pas verifikimeve ka rezultuar tip “Audi”, i vjedhur në Lushnje, ndërsa targat AA481GU janë denoncuar të vjedhura në Lezhë. Ndërkohë, ky mjet është gjetur i djegur në fshatin Pllanë.
Gjatë kontrollit në vendngjarje policia ka sekuestruar një armë automatik Mod. 56, dhe në afërsi të mjetit një aparat celular tipi “Nokia”. Provat materiale të sekuestruara janë çuar në laborator shkencor për t’u analizuar.
Biznesmeni menjëherë pas atentatit i është drejtuar Spitalit të Lezhës dhe gjatë udhëtimit, një automjet tjetër i është vënë në ndjekje. Ndërkohë Deda gjatë rrugës ka bërë disa telefonata me të afërm të tij, duke iu treguar se çfarë i kishte ndodhur.
Edhe pse i plagosur, ai ka mundur të përshkojë distancën rreth 15 km deri afër spitalit. Ndërkohë që gjatë rrugës ai ka humbur sasi të madhe gjaku. Pas mjekimit që ka marrë nga bluzat e bardha të Lezhës, ai është dërguar menjëherë për në Spitalin e Traumës, ku edhe ndodhet jashtë rrezikut për jetën.
Në lidhje me ngjarjen mësohet se janë shoqëruar në polici disa persona, që dyshohet se mund të kenë dijeni, ndërsa pritet dëshmia e të plagosurit, për zbardhjen e ngjarjes dhe kapjen e autorëve. Atentati ndaj biznesmenit, Aleksandër Deda, ndodhi në superstradën Lezhë-Milot pranë një lokali, mbrëmjen e së martës. / Opinion.al
