Autorët e krimit kanë shfrytëzuar më së miri një kodër që ndodhet përballë burgut të Vaqarrit.
Nga një distancë prej 400-500 metrash, ata kanë shtënë me armë nga kodra, e cila ka fushëpamje të plotë me godinën e burgut në njërin krah të saj. Zona ku kanë qëndruar e vepruar autorët ka rrugë automobilistike, por është e mbushur me bimësi në lartë si deri në 1.5 metra. Kjo gjë, me sa duket, ka qenë një ndihmë e madhe për autorët që kanë mbërritur aty dhe kanë lëvizur në zonë pa u diktuar apo pa arritur të identifikohen nga banorët e zonës. Grupi hetimor i Policisë së kryeqytetit ka marrë në pyetje banorët e zonës dje pas ngjarjes.
Ata kanë pohuar se kanë parë nga larg një makinë me ngjyrë të bardhë dhe dy persona që kanë lëvizur në kodrën nga u qëllua me armë në kohën kur ndodhi krimi. Sipas dëshmitarëve, dyshohet se autorët kanë qëlluar dy herë në drejtim të ambientit të ajrimit të burgut Vaqarr.
Videot e Burgut
Burime nga hetimi i ngjarjes kanë thënë se pas plagosjes së 40-vjeçarit me një plumb në këmbë, janë sekuestruar edhe pamjet e kamerave që monitorojnë ambientet e burgut. Nga këto pamje është konstatuar momenti kur i paraburgosuri nga Kosova është përkulur në momentin që është qëlluar me plumb në këmbë. Kjo ka ndodhur në kohën e përfundimit të qëndrimit në ambientin e ajrimit të personave të paraburgosur.
Nga videoja e kamerave, sipas hetuesve, përjashtohet mundësia e plagosjes së 40-vjeçarit nga brenda burgut./ Panorama.al
