Ervin Dalipi dhe Juxhin Dauti u vranë në atentat sot në mesditë teksa udhëtonin me një Audi në rrugën Durrës-Tiranë, pranë Sukthit. Persona ende të paidentifikuar shkrehën breshëri armësh ndaj tyre. Nga të dhënat e para dyshohet se objekt ka qenë Ervin Dalipi ish-shefi i Krimit Ekonomik në Policinë e Tiranës. Dalipi ishte shpallur në kërkim dhe po gjykohej në mungesë për rrëmbimin dhe vrasjen e Gazmend Çollakut në Durrës.
Ndërkohë mësohen të tjera detaje edhe viktimën tjetër Juxhin Dauti. Ai është akuzuar në 2012 për vrasjen e Fatjon Banit, ish-kampion i bilardos në Vlorë. Ngjarja ka ndodhur në Mars tët 2012-ës në Vlorë.
31-vjeçari Fatjon Bani u ekzekutua me tre plumba në trup, teksa lëvizte me makinën e tij në lagjen “Pavarësia” dhe konkretisht në afërsi të godinës së repartit të zjarrfikësve.
Për ngjarjen u dyshua si autor, shoku i tij, Juxhin Dauti, asokohe 22 vjeç.
Sipas hetuesve të çështjes, dy të rinjtë ishin duke udhëtuar bashkë në automjetin tip “Peugeot” me targa italiane, pas stadiumit të Vlorës, dhe gjatë kësaj kohë dyshohet se Dauti e ka qëlluar Fatos Banin me pistoletë. Për sa i përket motivit të krimit, dyshohet se mund të ketë qenë sherr i momentit, pasi dy të rinjtë njiheshin si shokë (ishin dhe fqinjë).
Por pas hetimit të ngjarjes dhe gjykimit të çështjes, Juxhin Dauti rezultoi i pafajshëm, pasi nuk u gjetën prova që e fajësonin për këtë vrasje.
