Detaje të reja janë zbardhur në lidhje me ngjarjen e ndodhur në Lundër të Tiranës, ku gjatë një atentati mbetën të plagosur me armë zjarri katër persona, dy prej të cilëve minoren.
Autoritetet bëjnë me dije se gjatë kontrolleve dhe hetimeve të kryera për këtë ngjarje, kanë gjetur në afërsi të fshatit Fikas, Mullet, një motor i djegur, i cili dyshohet se është përdorur nga autorët e kësaj ngjarjeje.
Grupi hetimor, në drejtimin e Prokurorisë, vijon punën për zbardhjen e rrethanave të ngjarjes dhe sigurimin e çdo prove që do të çojë në identifikimin dhe kapjen e autorëve.
Motori me të cilën autorët e larguan, është larguar në drejtim të Elbasanit. Grupi hetimor ka mundur ta ndjekë deri diku në autostradë, ndërsa më pas ka humbur gjurmët, pasi ka devijuar nëpër disa rrugë fshatrash pa mbërritur në qytet, në të cilat deri më tani ka qenë i pamundur gjurmimi pasi nuk ka kamera sigurie.
Gjatë kohës që atentatorët kanë nisur të qëllojnë në drejtim të makinës “G Class” që drejtohej nga Arenc Stafa, në lëvizje, përveç 7 gjurmëve të plumbave që janë gjetur në makinë, një tjetër plumb ka kapur një makinë tjetër që ka qenë duke lëvizur në afërsi. Drejtuesi i saj është larguar menjëherë prej frikës, por pak çaste më vonë ka njoftuar policinë.
Grupi hetimor, përveç verifikimeve që po kryen për pistën që e lidh me ngjarjen e Lezhës, ku 2 orë para saj u vra babai i Roan Brahimit, disa pista të tjera janë duke u verifikuar, por deri në këtë fazë asnjëra prej tyre nuk duket të jetë bindëse për të avancuar deri në zbardhjen konkrete të atentatit.
