Në masakrën që tronditi qytetin e Lushnjes, ku humben jetën dy persona dhe u plagosën dy të tjerë, janë ngritur dyshimet për një autor të tretë.
Lajmi është publikuar nga gazetari investigativ Artan Hoxha, sonte, në emisionin “Studio e Hapur”, i cili theksoi se dyshimet janë ngritur pas një cilësie të veçantë që ka i dyshuari si autor i tretë i masakrës.
Hoxha deklaroi se ai ka një defekt në të ecur dhe policia e ka identifikuar autorin e tretë në bazë të asaj që kanë deklaruar dëshmitarët.
Policia ka publikuar si emra të dyshuar të masakrës vetëm shtetasit Laert Haxhiu dhe Orges Bilbili.
Ngjarja
Dy të rinj u ekzekutuan me armë zjarri në një atentat mafioz në qytetin e Lushnjës me datë 11 tetor, 2017 rreth orës 18:00 në lagjen “Loni Dhamo”, në vendin e quajtur “Ura e Përroit” në shëtitoren e qytetit.
Viktimat janë Zamir Latifi, 23 vjeç dhe Jurgen Hoxha, 22 vjeç.
Nga të shtënat me armë mbetën të plagosur dhe shtetasi Mario Xhepexhiu, 26 vjeç, banues në lagjen “Loni Dhamo””, i cili ndodhej rastësisht në vendin e ngjarjes. Ai u transportuar në drejtim të Tiranës për mjekim më të specializuar.
Nga ngjarja, sipas policisë, ka mbetur gjithashtu i dëmtuar lehtë shtetasi B.T, 66 vjeç.
