Policia e Vlorës ka arrestuar Ferdinand Llanajn, 39-vjeçarin që mbeti i plagosur në atentatin e djeshëm në rrugën Transballkanike. Nga hetimet ka rezultuar se pistoleta model 56 që u gjet pranë automjetit të tij “Mercedes-Benz”, i përket pikërisht Llanajt. 39-vjeçari ju kundërpërgjigj me zjarr atentatorëve të tij.
Nga verifikimet e kryera, policia zbuloi se arma i përket pikërisht atij. Ferdinand Llanaj akuzohet për armëmbajtje pa leje.
Ndërkohë, hetuesit kanë sekuestruar kamerat e sigurisë të bizneseve pranë kësaj zone, që mund të ndihmojnë në zbardhjen e fakteve dhe sqarimin e dokumentimin e plotë të ngjarjes. Në vendngjarje u sekuestrua edhe një makinë tjetër “Renault Clio”, disa celularë dhe një shumë parash prej 1.6 milionë lekë.
Ndërsa në makinën BMW që u gjet e djegur në fshatin Kafaraj të Fierit, grupi hetimor gjeti dy kallashnikovë dhe 3 gëzhoja. Dyshohet se këto armë janë përdorur në atentatin ndaj Llanajt, ku mbetën të plagosur djali i tij 8-vjeçar B.Llanaj dhe Dritan Begaj 50 vjeç që ndodhej në makinë me të. Armët do të ekzaminohen, ndërsa hetimet vazhdojnë për të identifikuar atentatorët.
