Remzi Kulli, vjehrri i Fatbardh Licit, i vrarë në 10 gusht të 2018-ës është vetëdorëzuar në policinë e Shkodrës, teksa ka marrë përsipër arsenalin e armëve të gjetur në një banesë të braktisur në Velipojë.
Arsenali i armëve dyshohej se ishte lënë aty nga Ibrahim Lici, i shpallur në kërkim si autor kryesor për vrasjen e dyfishtë të vëllezërve Bilali, por 57-vjeçari deklaroi se 10 ditë para se të vritej dhëndri i tij, Fatbardh Lici, i ka dërguar armët në banesën e braktisur, bashkë me të. Edhe pse mbrojtja kërkoi një masë më lehtësuese për Remzi Kullin duke qenë se ka pranuar krimin, gjykata e shkallës së parë në Shkodër vendosi “arrest me burg”.
Kujtojmë se më 27 prill të këtij viti policia e Shkodrës pas informacionit për të shtëna në fshatin Luarës të Velipojës zhvilloi një aksion duke menduar fillimisht për ndonjë bazë droge.
Policia nuk arriti që të identifikojë se kush ka qëlluar pasi personat janë larguar me shpejtësi pa lënë gjurmë, por pas kontrolleve në çdo shtëpi për të kapur autorët, rastësisht policia gjeti në banesën e braktisur një arsenal armësh dhe municionesh.
Shtëpia i përket, Gëzim Selës, i cili është dhe vjehrri i vëllait të Ibrahim Licit. Kjo i ngriti dyshime policisë se Ibrahim Lici mund ta ketë përdorur banesën e braktisur si bazë për të lënë armët dhe municionet si dhe për t’ju fshehur policies.
Në banesë policia gjeti një arsenal armësh si një armë ushtarake të rëndë granat hedhës (blind shpues), silenciator, radio policie, 700 fishekë luftarakë, krëhëra me fishekë kallashnikovi, dy telefona dhe një targë motorçiklete.
Armët dhe municionet e gjetura në Velipojë dyshon se mund të jenë përdorur në ngjarje kriminale por autori i vetëdorëzuar, Remzi Kulli ka mohuar një gjë të tillë duke thënë se armët janë aty që në fillim të muajit gusht të vitit të kaluar./Opinion.al
