Policia greke po përpiqet të zgjidhë enigmën pas të shtënave jashtë shkollës Panormos në Athinë, ku kanë mbetur të plagosur 2 persona, mes tyre edhe një shqiptar.
Mediat greke bëjnë me dije se dy personat nuk njiheshin me njëri-tjetrin, bëhet fjalë për 32-vjeçarin shqiptar Jorgo Zeneli dhe një 20-vjeçare greke. Autoritet ngrejnë dyshimet se ngjarja është e mbuluar me mister pasi nuk ka asnjë dëshmitar dhe asnjë gëzhojë.
Sulmi ka ndodhur pak pas orës 8:30 të së dielës mbrëma, kur sipas informacioneve të deritanishme, një person ka qëlluar jashtë Liceut të 16-të të Athinës pas një debati dhe më pas është zhdukur.
Policia ka shkuar në vendngjarje dhe nuk ka gjetur të lënduar dhe as gëzhoja nga të shtënat.
Por pak më vonë, Policia u njoftua nga Spitali i Kryqit të Kuq për dy të plagosur, një greke 20-vjeçare dhe një shqiptar 32-vjeçar, të cilët kanë marrë plagë me armë zjarri.
20-vjeçarja ka treguar në Polici se ka marrë një plumb në kofshë teksa po ecte në kryqëzimin e rrugëve Panormos dhe Larisa, ndërsa nuk e njeh 32-vjeçarin shqiptar.
Siç rezultoi nga hetimet, shqiptari njihet nga autoritetet pasi ka qenë i arrestuar në të kaluarën për një rast të lëndëve narkotike dhe po shqyrtohet mundësia që 32-vjeçari të ketë qenë shënjestër e atentatit./Opinion.al
