Gjashtë muaj nga ekzekutimi i Elton Ciçës në lokal “De Niro” në zonën e Bllokut, një tjetër tentativë vrasje bëhet në Tiranë në një zonë të populluar dhe në mes të ditës. Mikut të çiçës, Andi Mustafaraj, i zunë pritë për ta vrarë sot tek lokal “Monroe” tek ish-ekspozita në Bulevardin Gjegj Fishta. 29 vjeçari i shpëtoi këtij atentati.
Ai mori plumba në shpatull por është jashtë rrezikut për jetën në spitalin e Traumës.
Lajmi u raportua fillimisht nga qytetarët në media më pas policia njoftoi se kur kishte mbërritur në vendin e ngjarjes nuk e kishte gjetur të plagosurin, pasi ishte dërguar në spital me makina të rastit.
Madje policia thotë se tek 112 në fillim është raportuar për aksident tek rruga “Nikolla Jorgo”. “Menjëherë kanë shkuar shërbimet e qarkullimit rrugor për të kryer veprimet e para hetimore por kanë konstatuar se te lokal “Merlin Monroe”, në verandën e lokalit dyshohej të ishte plagosur me armë zjarri një shtetas i identifikuar pak minuta me vonë si shtetasi A.M 29 vjeç banues Tiranë”, thuhet në njoftimin e policisë.
Më tej policia pranon se nuk e ka gjetur të plagosurin në vendin e ngjarjes. “Shtetasi i dëmtuar ishte dërguar për mjekim te menjëhershëm në spitalin e Traumës Tiranë”, thuhet në njoftim.
Andi Mustafaraj është person me precendent penalë dhe ka qenë mik me çiçon thotë policia. Sipas saj dyshohet se ngjarja e sotme ka lidhje me vrasjes e Elton çiçës në zonë e Bllokut 6 muaj më parë.
“Gjatë këqyrjes së vendit të ngjarjes janë konstatuar tre gëzhoja dhe dy predha, të cilat u sekuestruan në cilësinë e provës materiale”, tha policia ndërsa njofton se autorët ende nuk janë identifikuar, por punohet për zbardhjen e ngjarjes dhe arrestimin e tyre.
*Ne foto: Lokali ku ndodhi plagosja
