Një pako e dyshimtë e mbërritur në postën e Ministrisë gjermane të Financave alarmoi paraditen e sotme autoritetet në Berlin. Pakoja, adresuar Ministrit të Financave Wolfgang Schauble përmbante një sasi lënde plasëse.
Ajo u dallua rreth orës 10 të paradites nga autoritetet, pasi mund të dalloheshin telat që ndodheshin nga brenda.
Specialistët evakuuan ndërtesën dhe e morën pakon për të bërë të mundur ekzaminimin dhe shpërthimin e kontrolluar të saj. Operacioni zgjati për disa orë.
Sipas të përditshmes gjermane “Bild” pakoja kishte në brendësi miks lëndësh plasëse dhe nëse do të kishte shpërthyer do të shkaktonte lëndime serioze në njerëz.
Kjo nuk është hera e parë që autoritetet gjermane zbulojnë në kohë pako të tilla me destinacion godinat shtetërore.
Në Nëntor të 2010 –ës punonjësit e postës qëndrore dallua një palo të dyshimtë që kishte brenda eksploziv dhe që destinacion kishte godinën e Kancelares. Në Prill të 2013 – ës, rojet e sigurisë zbuluan një letër të dyshimtë drejtuar presidentit Joachim Gauck.
Dyshimet janë se në të kishte një material shpërthyes. Në Janar të 2016 –ës, Godina e Kancelares u bllokua pasi qentë antieksploziv nuhatën diçka të dyshimtë gjatë një inspektimi rutinë të postës. Megjithatë në këtë rast nuk u gjet asgjë e dyshimtë.
