Ditën e sotme qyteti i Durrësit u trondit nga një atentat i bërë ndaj prokurorit Arjan Ndoj në zonën e njohur si “Mbikalimi i Shkozetit”.
Së bashku me prokurorin, i cili mori dy plumba mbetën të plagosur dhe dy persona të tjerë, Aleksandër Laho dhe Andi Maloku të cilët po marrin ndihmën e nevojshme mjekësore. Deri më tani dyshimet e para janë se atentati është bërë për shkak të detyrës.
Por kush është prokurori Arjan Ndoj?
Arjan Ndoja është prokuror në Prokurorinë e Rrethit Durrës prej vitit 2008. Ai u rikthye në sistemin e Prokurorisë nga ish-kryeprokurorja Ina Rama, ndërsa më herët ishte shkarkuar nga detyra nga paraardhësi i saj, Theodhori Sollaku.
Gjatë periudhës 4 vjeçare që nuk ishte prokuror, Ndoja ushtroi funksionin e avokatit, ku mbrojti emra të njohur të botës së krimit. Në këtë periudhë ai shtoi pasurinë e tij me 740 mijë euro.
Në vitin 2008 ai u kallëzua nga ILDKPI për deklarim të rremë të pasurisë, por Prokuroria në atë kohë e pushoi procedimin penal. Pas këtij vendimi, Prokuroria e Përgjithshme ndërpreu edhe pezullimin e përkohshëm nga detyra duke e rikthyer në pozicionin e prokurorit.
Prokurori Arjan Ndoji ka qenë nën akuzat e kryministrit Rama dhe zv.kryeministrit Erjon Braçe se ka ushtruar presion gjatë hetimeve për regjistrimin e disa pronave në Durrës, çështje për të cilat u arrestua edhe ish drejtori i Kadastrës së Durrësit, Liridon Pula.
Zv.kryeministri Erjon Braçe ishte i pranishëm në seancën gjyqësore ndaj Pulës nga ku akuzoi prokurorin e çështjes Arjan Ndoja se “ka ushtruar presion ndaj punonjësve për të tjera objekte, duke përdorur çështjen në fjalë”. Pula akuzohet për një objekt i cili ka marrë leje zhvillimi dhe leje ndërtimi në zonën e Gjirit të Lalëzit./ Opinion.al
