U desh një status në facebook i Lulzim Bashës që ministrja e Arsimit Lindita Nikolla të bëhej e gjallë për incidentin e rëndë të Bulqizës ku 60 gjimnazistë u asfiksuan në orën e mësimit nga tymi i kaldajes.
Lindita Nikolla, po përmes facebook-ut i përgjigjet Bashës se ajo dhe qeveria e Edi Ramës po bëjnë gjithçka për të kthyer normalitetin në arsimin e shkatërruar që sipas saj u la qeveria e Berishës.
Po kështu Lindita Nikolla i kthehet avazit të Gërdecit, duke i thënë liderit demokrat Basha se “Edi Rama asokohe kreu i opozitës u soll si njeri normal dhe nuk i mor me hesapet politike”.
Ajo ç’ka vihet re lehtësisht është se ministrja e Arsimit ka kurajon të përballet lehtësisht me Bashën por me sa duket nuk e ka kurajon të thotë asnjë fjalë për prindërit e fëmijëve që sot panë tmerrin me sy.
Duhet theksuar gjithashtu se Ministria e Arsimit i është përgjigjur interesit të gazetarëve plot 5 orë pas ngjarjes së rëndë të Bulqizës duke dhënë një informacion të vonuar dhe të cunguar. /Opinion.al
***
Më poshtë statusi i plotë në facebook i Lindita Nikollës
Zoti Basha!
Në çdo vend normal dhe bashkësi normale njerëzish nuk ndodh kurrë që politika të bëjë hesapet e veta, teksa ka rënë një fatkëqësi, ciladoqoftë e për çfarëdo arsye qoftë!
Sot ne të gjithë po merremi me femijët e Shupenzës dhe ju siguroj se falë angazhimit të të gjithëve, ata fëmijë po marrin shërbimin e duhur në kohën e duhur. Ndërsa ju po bëni hesapet tuaja, duke mos pritur as deri nesër për të vazhduar muzikën e stonuar të gramafonit tuaj, me akuza e revolta kundër qeverisë.
Disa vite më parë, u vranë 26 vetë dhe u hodhën në erë qindra shtëpi zoti Basha dhe koha më pas, tregoi edhe si edhe pse u shkrumbua një fshat i tërë, 15 minuta larg qendrës së Tiranës. Por atë ditë, në ato orë tmerri kombëtar, Edi Rama, atëherë në rolin që ju keni sot, u tregua njeri normal i një bashkësie njerëzish normalë dhe nuk u mor me hesapet e veta politike. Besoj ju kujtohet! Madje armiku që ju ka verbuar sytë dhe errësuar komplet arsyen, mori në kurriz edhe shumë akuza e shpotitje të pamerituara për “rrahjen e shpatullave” të kryeministrit në deren e spitalit.
Po ju sot?
Ju sot vazhduat me avazin tuaj vulgar të çdo dite, duke vazhduar të bëni sikur nuk ishte qeveria juaj e vjetër që e la Shqipërinë dhe arsimin në pikën më të zezë të hallit! Ne nuk kemi bërë asnjë mrekulli, kemi ndryshuar gjëra dhe edhe më shumë do t’i ndryshojmë, po një gjë është e sigurtë: Mes nesh dhe jush, mes Edi Rames e teje, ka një ndryshim të madh, si në ditë të mira si në ditë të vështira.
Është ndryshimi mes njerëzve normalë që duan ta bëjnë normal këtë vend, duke mbajtur në kurriz prej katër vjetesh, të gjithë trashëgiminë e rëndë të keqqeverisjes suaj të gjatë dhe politikanëve anormalë. Të cilët këtë vend e duan vetëm kur i mban ata në kurriz ose përndryshe, janë gati t’i vënë shqelmin çdo ditë për të mos e lënë askënd të jetojë dhe punojë normalisht.
Ju qofshi!
Statusi i liderit demokrat Basha në facebook për ngjarjen e Bulqizës
Po ndjek nga afer gjendjen e nxenesve te gjimnazit te Shupenzes, te asfiksuar ne oren e mesimit nga gazi karbonik. Duke ju uruar sherim sa me te shpejte te rinjve qe po marrin mjekim ne Bulqize dhe Peshkopi si dhe per nxenesen e sjelle ne Tirane ne gjendje me kritike se te tjeret, shpreh keqardhjen dhe revolten per pasigurine e ambjenteve qe vene ne rrezik shendetin e nxenesve ne shkolla. Investimet ne shkolla nuk mund te behen pjese e babezise qeveritare qendrore apo lokale. Deputeti i Partise Demokratike, Xhemal Gjunkshi, ndodhet ne Diber per te qene prane nxeneseve dhe familjareve te tyre dhe per te marre informacion te detajuar mbi pergjegjesit e asfiksimit te 60 nxenesve te Shupenzes.
