Partia Socialiste ka mbledhur sot Asamblenë Kombëtare. Fjala e hapjes është mbajtur nga kreu i PS-së, Edi Rama.
Në fjalën e tij, Rama ka numëruar reformat e bëra nga qeveria, duke e quajtur inventarin më të plotë të gjithë 25 viteve.
“Dua ta nis me një përmbledhje të punës së bërë dhe një sërë arritjesh në të gjitha fushat e veprimtarisë qeverisëse, se besoj që përbëjnë bazën mbi të cilën duhet të ngrihet komunikimi i brendshëm në këtë proces organizimi kapilar të partisë në funksion të zgjedhjeve, që janë në prag”- tha Rama.
Rama numëroi më radhë reformat ndalur kryesisht në atë në fushën e energjetikës, duke kujtuar se jo vetëm çmimi i energjisë nuk u rrit, por u ul nga 9.7 në 9.5, ashtu si është fakt i pakontestueshëm se në vend nuk ka faturim aforfe dhe që cdo konsumator të ketë matësin dhe të paguajë vetëm për atë.
“U fshinë nga sistemi faturimet abuzive dhe iu kthyen publikut 15 milionë dollarë, ashtu si edhe 72 milionë dollarë kamatvonesa të falura nga zbatimi i skemave lehtësuese të pagesave dhe për shkak të kësaj thellësie dramatike që pati reforma dhe vullnetit me fakte e rezultate u garantua paketa më e madhe e investimeve në 25 vjet për sektorin elektroenergjitik prej 300 milionë eurosh”- tha ai.
