Maturantët i janë nënshtruar sot provimit të anglishtes së Maturës Shtetërore 2019. Për mbarëvajtjen e këtij procesi u angazhua edhe Drejtoria e Përgjithshme e Policisë së Shtetit. Forcat e policisë do të garantonin transportin e tezave të provimeve si dhe ruajtjen e godinave ku do të zhvillohen provimet.
Megjithatë kjo masë e propozuar nga Ministria e Arsimit duket se nuk ka qenë aq efektive. Menjëherë janë denoncuar raste të daljes së tezës së provimit të anglishtes nga autoritetet përgjegjëse. Ish kryeministri Berisha ka postuar në Facebook me foto një denoncim të ardhur nga Kukësi. Ai akuzon se shpërndarja e tezave përpara provimit është bërë me qëllime partiake për të marrë votat e prindërve të fëmijëve që ju është dhënë teza.
Kjo është një shkelje e rëndë që i bëhet procesit të maturës shtetërore. Çdo vit ka patur denoncime për abuzime me daljen e tezave të provimeve. Por megjithëse këtë radhë Ministria Arsimit angazhoi forcat e policisë gjatë gjithë procesit, as ata nuk kanë arritur dot të ruajnë tezat e provimeve. /Opinion.al
