Vdekja e këngëtares së njohur Nexhmije Pagarusha ka sjellë hidhërimin e popullit shqiptar e në veçanti të artistëve që kanë mundur t’a njohin nga afër dhe të punojnë me të. Muzikanti njohur Zhani Ciko, e ka cilësuar Pagarushën si një yll, që do të mbetet në muzikën shqiptare.
“Lajmi është i trishtueshëm në kuptimin që u shkëput një yll, si ato yjet e qiellit pranveror dhe Nexhmije Pagarusha është një yll, që do të mbetet në muzikën shqiptare. Një personalitet i padiskutueshëm, maksimal, sidomos në fushën e këngës popullore, ku ka sjellë modelin e një këngëtareje të përsosur, pasi zotëronte një vokal të shkëlqyer. Ajo ka sjellë disa modele, që janë pika referimi. Pagarusha është një person që ka lënë mbresa të jashtëzakonshme me cilësitë e larta njerëzore. Unë kam qenë i privilegjuar, pasi e kam njohur që ditën e parë që ka ardhur në Shqipëri e deri sot, duke menduar dhe takimin e fundit në Kosovë, me rastin e promovimit të librit të saj. Jam i prekur. Mendoj se shqiptarët dinë se kë vlerësojnë dhe Pagarusha është nga ato që meriton piedestalin e artë të muzikës popullore. Ishte nga ata përfaqësues të mëdhenj të artit shqiptar, në fushën e saj. Ishte ndër më të mëdhajat që ka kombi ynë”, -u shpreh Ciko.
Ndonëse kompozitori Edmond Zhulali nuk ka bashkëpunuar me të,ai thekson se ka qenë i befasuar nga ‘baresha’.
“Është një lajm shumë i hidhur në radhë të parë për artin shqiptar dhe atë kosovar pasi Nexhmije Pagarusha ishte një këngëtare e mrekullueshme pasi ka lënë një zë të mrekullueshëm në botën muzikore shqiptare. Lajm i dhimbshëm pasi ajo ishte e sëmurë prap artistët shqiptarë janë shumë të dashur për publikun sidomos me ne që kemi qenë kolegë. Mbaj mend kontaktin e parë me të, kur ajo ishte e ftuar nderi në Festivbalin e RTSH. Ishte njeri i rrallë edhe nga pikëpamja njerëzore dhe komunikimi. Ishte një fakt që unë nuk e dija pasi dinim se Nexhmije Pagarusha kishte studiuar për kanto, dhe kur më tha që zërin e kam natyral pasi ajo ka një shtrirje për kanto duke kënduar për gjithë këngët edhe popullore dhe është rast i rrallë për
Nuk kam pasur fatin të bashkëpunoj me të se ajo është më e madhe, dhe është brez tjetër. Kënga baresha është një nga veprat më të rralla të saj, por edhe nga këngët shqiptare sidomos për nga interpretimi. Dhe ajo mbetet unike në të gjitha interpretimet. Ka qenë personalitet dhe që krijon boshllëk pavarësisht se ajo ka kohë që ka lënë muzikën humbja është e shumëfishtë. Ngushëllime familjarëve, artistëve, dhe të afërmve,”-përfundon ai.
Edhe për sopranon me famë botërore Inva Mula, bilbili i këngës shqipe, Nexhmije Pagarusha ka shënjuar në jetën e saj.
“Për një zonjë të nderuar dhe artiste që bëri histori në kohë të vështira dhe dha guston e bukur të interpretimit të këngës shqiptare me elokuencën e saj, me elegancën, bukurinë e shpirtit, vokalin . Kam pasur fatin ta njoh dhe ka shënjuar në jetën time, pa ditur se ishte Nexhmije Pagarusha dhe kam thënë si ka mundësi një vajzë kaq e bukur të vijë në Tiranë. Të nesërmen e pashë në skenë dhe interpretimi ka qenë shumë i bukur. Ajo ka qenë shembull, e kam dashur shumë, e kam takuar vazhdimisht, e kam telefonuar.
Hera e fundit që e kam takuar ka qenë më pak se një vit dhe tani duhet ta shaj dhe veten se po ta dija që ishte e sëmurë rëndë ta takoja përsëri. Më vjen keq por Nexhmije Pagarusha do të futet në legjendat e artistëve, në ato legjenda që i krijon koha, personaliteti. Jetë të gjatë emrit të Nexhmije Pagarushës. Ka qenë një moment shumë i bukur kur doja të bëja një koncert me rastin e 80- vjetorit të babait tim.
Shkova vetë në Prishtinë t’i kërkoja Nexhmije Pagarushës të vinte dhe pse ishte shumë e sëmurë.
Udhëtuam bashkë dhe nuk e di ku e gjeti forcën dhe u ngrit dhe erdhi në Tiranë ndërkohë që unë isha shofere. Nuk e di ku e gjeti forcën por shpirti i saj ishte shumë i madh,”-përfundoi ajo.
Këngëtarja Nexhmije Pagarusha ndërroi jetë ditën e sotme në moshën 86-vjeçare./Opinion.al/
