Kozma Lara një nga profesorët dhe akademikët më të nderuar të vendit ka ndërruar jetë në moshën 89-vjeçare. Homazhet në nderim të tij u mbajtën sot në hollin e Universitetit të Arteve nga ora 11.00-12.00.
Kozma Lara ka qenë një ndër figurat muzikore me përmasa kombëtare të gjysmës së dytë të shekullit XX në Shqipëri, krahas një numri kompozitorësh, si: Çesk Zadeja, Tish Daija, Nikolla Zoraqi, Tonin Harapi, etj.
Lara u lind në Durrës, më 10 Korrik 1930. Veprat e tij të para, filluan të dëgjoheshin në vitet ’60-të. Lara kompozoi muzikën e baletit “Fatosi partizan”, që u vu në skenë nga koreografi Panajot Kanaçi.
Mësimet e para në piano e kreu me profesorin Tonin Guraziu. Më pas në vitet 1946-49 mbaron shkollën e mesme të përgjithshme “16 Shtatori” në Durrës. Ndoqi liceun Artistik “Jordan Misja” në Tiranë ku dhe diplomohet në degën e pianos në vitin 1954.
Në vitin 1958 studion në Konservatorin P. Iliç. Çajkovski në Moskë (ish BRSS), në degën e Kompozicionit, student i Profesorit Sergey Artem’yevich Balasanian.
Gjatë viteve ka kontribuar në Asamblin e Ushtrisë Popullore, në Teatrin e Operas dhe Baletit në Tiranë si Koncert Maestër dhe në Shkollën e Mesme të Muzikës Mujo Ulqinaku-Durrës.
