Turku Abdulselam Turgut, i cili, sipas policisë shqiptare ka bashkëpunuar me celulën iraniane që planifikonte sulme terroriste në Shqipëri, është një emër i njohur për drejtësinë shqiptare.
Në shkurt të vitit 2011, në moshën 45 –vjeçare, ai u arrestua në Rinas. U prangos pasi emri i tij figuronte në listën e Interpolit, si i kërkuar nga policia gjermane që në vitin 2009 për trafikimin e 1 ton droge, një vepër që dënohej në Gjermani me 15 vjet burg.
Gjykata e Apelit të Tiranës e liroi atë. Trupa e gjyqtarëve përbëhej nga Gjin Gjoni kryesues dhe me anëtarë Hysni Demiraj e Agron Papajani, vendosi lënien e turkut në arrest shtëpie, duke ndryshuar masën e vendosur fillimisht nga shkalla e parë me 40 ditë burg. Më pas ai u arratis dhe policia shqiptare nuk ra dot më në gjurmët e tij.
Sipas gazetarit Artan Hoxha, për “lirimin” e tij janë paguar 1 milion dollar.
Artan Hoxha: Ai është i lirë, është liruar në dhjetor të vitit të kaluar nga burgu në Turqi. Abdulselam Turgut është i njohur, që nga fundi i shekullit të kaluar si një nga bosët e trafikut të drogës së Afganistanit. Dhe ka përdorur rrugën e Ballkanit për të çuar drogën në Evropë. Ky kishte infrastrukturën, kishte lidhje, kishte njohje në Shqipëri. Ky ka patur lidhje të hershme në Shqipëri. Ka ardhur prapë në Shqipëri dhe pas arrestimit në vitin 2011, ai del dhe tek laboratori i kokainës në Has. Ata kanë dashur të përdorin lidhjet dhe njohjet e tij në Shqipëri, sidomos për të siguruar bazën logjistike. Si futen armët në vend? Nga grupet kriminale që operojnë sigurisht./ Opinion.al
