Pas ndalimit nga Prokuroria e Krimeve të Rënda mbrëmjen e djeshme, me akuzën e nxjerrjes së sekretit shtetëror në studion e emisionit “Opinion”, gazetari Artan Hoxha deklaron sot se vëmendja e organeve hetimore po derivohet nga zbulimi i aktivitetit kriminal te puna e tij si gazetar.
Hoxha e quan të pa sens sekuestrimin e telefonave të tij, duke deklaruar se nuk ka komunikuar asnjëherë me pilotin italian, e për rrjedhojë hetuesit nuk kanë për të gjetur asnjë bisedë të tijën me pilotin.
“Nuk jam pjesë e trafikut, kam punuar vetëm të vërtetën”-tha ai.
“Për fat të keq vëmendja e publikut dhe organet e hetimit është derivuar. Në vend që të merremi me kushe e ka organizuar, finacuar dhe kush fshihet pas këtij aktiviteti kriminal, merremi me kush e nxorri sekretin, cfarë ka në telefonat e tij.Janë sekuestruar telefonat e mi dhe të pilotit italian. Do ti sugjeroja hetuesve që unë nuk kam komunikuar me pilotin italian, dhe nuk do gjejnë asnjë shkëmbim telefonatash tjetër mes meje dhe atij piloti. Unë nuk jam pjesë e trafikut. Kam bërë maksimumin për të zbuluar të vërtetën. Kushdoqoftë fuqia madhore, në pushtet apo opozitë, më vjen keq. Parimi im dhe i gazetarëve është të raportojmë lajmin, nuk jemi lajmi. Në vend që të raportoja sot, jam kthyer në jë lajm. Gjë që nuk e kam dëshiruar.”
Për Hoxhën nuk është normale që sapo ai u fut në Prokurori, u lirua piloti që rrëzoi avionin. Gjatë marrjes në pyetje nga Prokuroria, ai deklaron se u pyet se “Si ishte e mundur që kishte atë informacion për dëshminë e pilotit italian?”
“Nuk ka sens që sapo u futa unë në Prokrurori, u lirua piloti. Kjo nuk ka sens. Avionin nuk e ula unë. Në mesnatë piloti qëndroi në një hotel, si mund të jetë ai më i sigurt në një hotel privat se në ambientet e prokurorisë”.
Gjatë emisionit “Opinion”, Hoxha bëri publike dëshminë e pilotit italian para Prokurorëve, që pati deklaruar se kishte ardhur për të testuar pistën e Ishmit, përmes së cilës do të transportonte më vonë 200 kg drogë.
Opinion.al/a.h
