Gazetari Artan Hoxha ka theksuar sonte në studion e emisionit ‘Opinion’, se Prokuroria e Katanias është duke kryer verifikime për ish-ministrin e Brendshëm, Saimir Tahiri.
Hoxha u shpreh se për momentin ish-ministri nuk është nën hetim, por autoritetet italiane kanë nisur procedim për çështjen, kjo do të thotë se aktualisht hetuesit janë duke verifikuar nëse personi në fjalë ka lidhje me bandën e Habiljave.
Sipas tij, ky lloj verifikimi ka nisur që në datën 27 tetor dhe se aktualisht janë duke u parë përgjimet, dokumentat, lidhjet dhe dëshmitë e dhëna.
Nga ana tjetër, përmes një lidhjeje telefonike në studio, avokati i Saimir Tahirit, theksoi se nuk është në dijeni të një njoftimi zyrtar nga pala italiane se ka një procedim penal.
Më tej, Haxhia u shpreh se vërtetësia e atij dokumenti, që u përmend më parë është 100 për qind i vërtetë, pasi ka ardhur grupi i prokurorëve nga Italia dhe ka sjellë gjithë materialin, por emri i Saimir Tahirit nuk figuron si një person në proces penal.
