Artan Gaçi: Të pasur në Shqipëri janë vetëm tenderaxhinjtë

Artan Gaçi, deputet i Partisë Socialiste, është shprehur se politika korruptive e tenderave duhet të marrë fund njëherë e mirë. Madje sipas Gaçit, aksioni i informalitetit duhet të ndiqet edhe te tenderimet. “Ke njerëz që marrin prej vitesh tenderë me qindra dhe miliona euro dhe nuk investojnë në asnjë aktivitet prodhues, në asnjë aktivitet turistik, në asnjë aktivitet që gjeneron të mira për vendin. Të mos bëjmë sikur nuk jetojmë të gjithë këtu. Ne vazhdojmë të jemi vendi më i korruptuar në Europë dhe kjo qeveri po merr të gjithë iniciativën dhe me investime në fushën elektronike për të minimizuar sa më tepër kontaktin fizik, i cili është një nga burimet e korrupsionit dhe po ashtu për të kaluar online të gjitha shërbimet në mënyrë elektronike për të eliminuar sa më shumë kontaktet që mund të gjenerojnë korrupsion. Unë jam për të nxitur reformën për një luftë kundër jo informalitetit, por kundër korrupsionit dhe hajdutërisë me paratë publike. Dimë shumë mirë sesi bëhen tenderët në Shqipëri. Ka kompani që kanë 25 vjet marrin tenderë. PD ishte mjeshtre sesi i kanalizonte të gjithë tenderët në 4 duar. Po të marrim historinë e këtyre 20 vjetëve, t’i marrim me sektorë të caktuar tenderët kanë shkuar te të njëjtit njerëz. Në Shqipëri janë të gjithë tenderaxhinjtë më të pasurit e Shqipërisë”, – tha Gaçi, duke vlerësuar se kjo situatë nuk është normale.