Topçinjtë kanë publikuar gjendjen e tyre bankare, për të tronditur fuqishëm themelet e klubeve që në letër konsideroheshin deri më parë si më të mëdhatë dhe më të pasurat. Në llogarinë bankare të klubit të Arsenal numërohen plot 260 milionë euro. Sipas kësaj deklarate financiare për këtë vit financiar, klubi londinez ka më shumë para se Barcelona, Real Madrid dhe Bayern Munich të marra sëbashku. “Rezervat tona të parave në fund të vitit shënonin plot 260 milionë euro dhe kjo shifër pa asnjë dyshim do të ngjallë spekullimet nga tifozët dhe komentatorët. Në këto kushte, është detyra ime që të theksoj se duke zbritur këtu rezervat për shërbimin e borxhit dhe shumat që u detyroheshim klubeve të tjera mbi transferime të mëparshme, balanca reduktohet në 170 milionë euro. Kjo shifër në vetëvete është e prekur nga inflacioni, për shkak të sezonalitetit të burimeve tona të të ardhurave, nga sponsorizimet e marra paraprakisht, si dhe faturimi i biletave sezonale”, deklaroi drejtori i Arsenal, Sir Chips Keswick.
“Përkundër balancës së nënvizuar mbi fondet në dispozicion, sikurse u përmend më sipër, ne kemi investuar fuqishëm në blerjen e futbollistëve gjatë verës, për një total transferimesh me kosto më shumë se 103 milionë euro, me rritje të ndjeshme pagesash të futbollistëve, pagesat e agjentëve të futbollistëve, si dhe bonuset që i atribuohen performancës. Ndërkohë që kemi shpenzuar fuqishëm, nga ana tjetër nuk jemi shtrirë përtej. Do të kishte qenë një praktikë e keqe biznesi nëse nuk do të kishim ruajtur një gradë të vogël fleksibiliteti, që të na ndihmonte ne për të investuar sërish te futbollistët e duhur, ose për të ruajtur skuadrën aktuale nëpërmjet përmirësimit të kushteve financiare për disa futbollistë të rëndësishëm të ekipit”, detajoji drejtori i Arsenal.
“Ne i bëjmë investimet tona mbi një bazë prudente dhe të arsyeshme, çka është diçka që klubi e bën shumë mirë dhe që është edhe më e rëndësishme në një treg kompetitiv me inflacion. Kjo përqasje na ka shërbyer mirë dhe do të vijojë”, përmblodhi drejtori Sir Chips Keswick. Grupi financiar “Arsenal Holdings plc” në përgjithësi shfaqi një rënie në përfitim para taksave nga 20.1 milionë euro, në 3.3 milionë, por fitimi i tyre nga futbolli u rrit nga 377 milionë në 401 milionë euro. Listpagesa në “Emirates” u rrit në 222.7 milionë euro, ndërkohë që balanca e parave të Arsenal ishte vetëm pak më poshtë, pikërisht në kuotën 219 milionë euro.
Ivan Gazidis deklaroi në raportin e tij si shef ekzekutiv, që shoqëronte rezultatet: “Ne jemi në pozita të fuqishme për të vazhduar të ecim përpara në çdo nivel të klubit. Në fushë ne kemi një ekip të jashtëzakonshëm. Jashtë fushës ne kemi zhvilluar infrastrukturën në të gjitha aspektet për aktivitetet tona, për të siguruar se kemi asetet e duhura dhe cilësitë për të progresuar. Unë jam i bindur se ky progres, i shoqëruar me disa vlera të nënvizuara, do të na çojë te suksesi që të gjithë kërkojmë. Ambicia jonë më e fundit është e qartë: të fitojmë trofe madhorë dhe të bëjmë që tifozët e Arsenal në shtëpi dhe kudo në botë të jenë krenarë për këtë klub madhështor. Krenarë për vlerat tona, krenarë për mënyrën se si veprojmë dhe krenarë për skuadrën”.
