Trajneri francez Arsene Wenger ka deklaruar sot për mediat britanike se mund të mos e rinovojë kontratën e tij me Arsenal në fund të këtij sezoni. Pas 20 vitesh në krye të “topçinjve”, Wenger pritet të largohet, por vendimin përfundimtar trajneri do ta marrë në pranverën e 2017-ës. Trajneri ka konfirmuar sot se do të shohë ecurinë e skuadrës në kampionat para se të vendosë për të ardhmen e tij. Kontrata e Wenger me Arsenal skadon në fund të këtij sezoni, ndaj ka gjasa që ajo të mos rinovohet më, siç ka ndodhur 20 vitet e fundit.
Megjithatë, për trajnerin francez kjo nuk është hera e parë që ndodhet në një situatë të tillë. Arsene Wenger feston sot 67 vjetorin e lindjes. Trajneri francez Arsene Wenger prej 20 vitesh tek Arsenali “Unë gjithnjë kam thënë se do të marr një vendim përfundim për të ardhmen time gjatë pranverës”, tha për mediat trajneri 67-vjeçar, që më tej shtoi: “Klubi është i lirë të marrë vendimin e tij, nuk ka pse kushtëzohet nga unë, për faktin se kam këtu për një periudhë të gjatë si trajner. Ne jemi në të njëjtën varkë dhe duam më të mirën e Arsenal”, tha Wenger që me “topçinjtë” ka fituar 9 tituj të mëdhenj në karrierën e tij. Por titulli i fundit kampion në Premier League mungon që prej vitit 2004. “Më ka ndodhur edhe më parë. Të gjithë një ditë do të largohemi. Unë kam nënshkruar disa herë me Arsenal në mars apo prill për disa vite, ndaj nuk është problem. Për të ardhmen time flasim në pranverë”, u shpreh Arsene Wenger.
