Sekretari amerikan i Shtetit, Mike Pompeo ka kërkuar nga talibanët “të dhëna të verifikueshme” se do të ulet niveli i dhunës në Afganistan , para se të nënshkruhet marrëveshja, e cila do të rezultonte me bisedime paqësore dhe tërheqje të trupave amerikane nga ky shtet.
Në një konferencë për media në Uzbekistan, Pompeo tha se arritja e marrëveshjes është afër, teksa shtoi se ata kanë qenë të gatshëm për të arritur në këtë pikë edhe më herët.
“Ajo çfarë jemi duke kërkuar tani është ofrimi i të dhënave të verifikueshme për ulje të dhunës dhe kërcënimit, që të kemi më pak dhunë. Ne besojmë se mund ta arrijmë këtë gjë, mirëpo nuk kemi arritur ende aty, ndaj po vazhdojmë të punojmë”, ka thënë mes tjerash Pompeo.
Këto deklarata kanë ardhur dy ditë pasi i dërguari i Shteteve të Bashkuara për bisedime të paqes në Afganistan, Zalmay Khalilzad, i ka thënë presidentit afgan, Ashraf Ghani se bisedimet me talibanët nuk kanë arritur ende aty ku duhet./Opinion.al
