Liderët e vendeve anëtare të Bashkimit Europian arritën të dalin me një marrëveshje pas samitit për zgjedhjen e drejtuesve të institucioneve kryesore evropiane.
Ministrja gjermane e Mbrojtjes, Ursula von der Leyen, do të jetë presidente e Komisionit Evropian, kryeministri i Belgjikës, Charles Michel është presidenti i ri i Këshillit Evropian, politikën e Jashtme të BE-së, do ta udhëheq ministri i Jashtëm spanjoll, Joseph Borell dhe Christine Lagarde, drejtoreshë e Fondit Monetar Ndërkombëtar, do të bëhet udhëheqë Bankën Qendrore Europiane.
Ursula von der Leyen do të jetë gruaja e parë që do të drejtojë institucionin kryesor evropian.
Ajo mban postin e ministres së mbrojtjes në Gjermani që nga viti 2013, dhe konsiderohet si një nga bashkëpunëtoret më të ngushta të kancelares, Angela Merkel.
Propozimi për të ka pasur mbështetjen e Francës, Spanjës dhe katër vendeve të Europës Lindore, Hungaria, Polonia, Çekia dhe Sllovakia.
Charles Michel, do të zëvendësojë Donald Tusk dhe do jetë kështu belgu i dytë në krye të Këshillit Evropian. Nga viti 2014 ai drejton qeverinë belge. Ai do të përfaqësojë liberalët në institucionet evropiane.
Joseph Borell është aktiv në politikën spanjolle që nga fundi i viteve 1970, kur ka mbajtur poste në ministri të ndryshme. Nga 2004 deri më 2007 ai ka qenë President i Parlamentit Europian. Ai është një përfaqësues socialist, i cili ka udhëhequr diplomacinë spanjolle që nga viti 2018. Tashmë ai do të jetë Përfaqësuesi i Lartë për Politikë të Jashtme dhe Siguri duke zëvendësuar Federica Mogherinin. Kjo e fundit është marrë drejtpërdrejt me dialogun midis Serbisë dhe Kosovës. Kjo do të jetë dhe hera e parë që ky funksion, ka një përfaqësues të një shteti, që i përket një grupi të vendeve të BE-së që nuk e njohin pavarësinë e Kosovës.
Christine Lagarde drejton Fondin Monetar Ndërkombëtar që prej 2011. Kryeministri holandez Mark Rutte tha për të “Unë e njoh si Christine Lagarde si shef i FMN-së, e njoh si një grua të hekurt, si dikush që e di se çfarë dëshiron, e cila është shumë e qartë në dhënien e udhëzimeve dhe shkoni tek ajo për të marrë një hua, është shumë e vështirë tek kushtet, kështu që nuk do të doja të isha vendi evropian i cili duhet të shkojë në Bankën Qendrore Europiane për t’i kërkuar favore “.
Presidenti i Komisionit Evropian, si dhe të gjithë komisionerët, duhet të konfirmohen me votë nga Parlamenti Evropian. Përveç presidentit të Parlamentit, i cili do të marrë detyrën menjëherë pas votimit, udhëheqësit e tjerë do të vendosen në zyra në nëntor të këtij viti. /Opinion.al
