Negociata pa fund, por Hysaj dhe Napoli më në fund kanë gjetur gjuhën e përbashkët dhe do të firmosin rinovimin në fillimin e javës.
Eksperti i merkatos italiane, Alfredo Pedulla, ka zbuluar nga burime pranë klubit italian se si janë detajet financiare që janë përfshirë në marrëveshjen e re që do të firmosë mbrojtësi i përfaqësueses shqiptare.
Kontrata e re do të zgjatë deri në vitin 2021, ndërsa paga e futbollistit fillon nga 1,4 milionë euro neto në sezon plus bonuse, për të arritur në 2 milionë euro në vitin e tij të fundit të kontratës.
Një klauzolë e veçantë parashikon zgjatjen e marrëveshjes deri më 30 qershor 2022, me rrogën e cila në këtë rast do të shkonte në 2,5 milionë euro plus bonuse.
Për sa i përket klauzolës së largimit, De Laurentis ka vendosur një shifër shumë të lartë, për të përfituar maksimalisht nëse ndonjë klub tjetër dëshiron të rrëmbejë lojtarin, siç veproi Juventusi me Higuain. Kushdo që do të marrë Hysajn nga Napoli pa negociuar me vetë klubin, do të duhet të paguajë një çek prej 50 milionë eurosh.
